De Favorit schéngt de Chef vum zentristesche MoDem, de François Bayrou ze sinn. Eng Zort Kompromësskandidat an enke Vertraute vum Macron. Fir den Olivier Faure, Chef vun de Sozialisten, wier dat awer keng Optioun. Fir hie géif de Bayrou déi aktuell Regierungspolitik representéieren, mat där een eigentlech brieche misst.
Aner Nimm wieren de sozialisteschen Ex-Premier Bernard Cazeneuve an den Interims-Arméiminister Sébastien Lecornu.
Wien d'Nofolleg gëtt ass eng Saach. Déi Persoun muss deen Ament och handlungsfäeg sinn. Eng grouss Koalitioun ass onrealistesch. An der Entrevue en Dënschdeg gouf dofir awer iwwer een Accord de non-censure diskutéiert. D'Sozialisten, d'Ekologisten an déi Konservativ wiere bereet fir esou eng Léisung.
Enn vum Nouveau Front Populaire?
Wann d'Sozialisten esou een Accord matdroen, géif dat d'Enn vun der lénker Allianz, dem Nouveau Front Populaire bedeiten. La France Insoumise geheit de Sozialiste vir sech vum Macron instrumentaliséieren ze loossen. LFI géif noutfalls awer den Nouveau Front Populaire eleng weiderféieren.
Mat der Annonce, wien elo d'Nofolleg vum Michel Barnier iwwerhëlt, ass eréischt méi spéit haut um Donneschdeg ze rechnen. Dat well den Emmanuel Macron a Polen op Aarbechtsvisitt ass.