Vun Harry Potter Musek bis Telemann
De jonke brittesche Braatschist Timothy Ridout huet mat 8 Joer ugefaange mat sengem Instrument. Loscht fir d'Braatsch krut hien, wéi hie Musek aus den Harry Potter Filmer op deem Instrument héieren huet. Op sengem neien Album sinn awer net déi magesch Kläng ze héiere, mee Wierker aus verschiddenen Zäiten. Aus dem Barock stinn de Georg Philipp Telemann an de Johann Sebastian Bach um Programm, aus der Moderne ass et de Benjamin Britten, an aus der aktueller Zäit ass et d'Caroline Shaw. Hiert Wierk "In manus tuas" huet si 2009 fir eng Cellistin komponéiert, an dat Wierk ass zu New Haven am US-amerikanesche Staat Connecticut uropgefouert ginn.
Wéi wann een direkt nieft dem Museker stoe géif
Den Timothy Ridout bitt hei keng gewéinlech Opnam, mee eng bei där ee mengt, et géif ee ganz no virum Museker stoen. Et ass eng immens intim Produktioun, déi een definitiv aus dem Alldag eraushuele kann.
Dem Bach seng berüümt Chaconne op der Braatsch
Ee vun de Wierker um neien Album ass dem Bach seng weltberüümt Chaconne. Dat virtuoost a komplext Meeschterwierk ass ronn 16 Minutte laang, an original fir Gei komponéiert. Den Timothy Ridout léisst d'Wierk esou klenge, wéi wann et fir Braatsch geduecht wier, an hie bréngt gläichzäiteg eng Liichtegkeet an eng Kraaft eriwwer.
Iwwert dës Produktioun ënnerhält sech de Lex Kauffmann mam Marie Schockmel.
