Hei kënnt dir nach emol a Resonanzen eralauschteren.
1) Mel Bonis - ee Pseudonym mat ville Facetten
D'Geiistin Sandrine Cantoreggi an d'Pianistin Sheila Arnold widmen sech well eng Rëtsch Joren der Musek vun der Melanie Bonis. Eng Kënschtlerin, déi trotz verstoppter Identitéit immens vill Musek hannerlooss huet.
Concert den 02. Mäerz mat der Geiistin Sandrine Cantoreggi a Pianistin Sheila Arnold
Sandrine Cantoreggi (©Radio 100,7) & Seila Arnold (©Marion Koell)
Dëser Kënschtlerin hunn sech déi lëtzebuergesch Geiistin Sandrine Cantoreggi an déi däitsch Pianistin Sheila Arnold ugeholl. Si fannen, et ass derwäert der Mélanie Bonis hir Musek un d'Leit ze bréngen a méi bekannt ze maachen. Dofir hunn si Enn 2023 net nëmmen een Album mat der Mel Bonis hirer Musek erausbruecht. Ma aktuell schaffen si och un engem Concertsprogramm am Ettelbrécker CAPE, deen de Fokus op dës spéitromantesch-postmodern Kënschtlerin leet.
Am Gespréich mam Lex Kauffmann schwätzen d'Musekerinnen iwwert hir déifgrënneg Recherche iwwert déi franséisch Komponistin, hir Faszinatioun fir dëse Personnage an d'Relevanz vun dëser Musek hautdesdaags.
2) Pianosduell tëscht Klassik an Jazz
Zwee Pianisten, zwee Pianoen a ganz vill Improvisatioun erwaarden d'Visiteure beim Concert vum Jean-François Zygel a Paul Lay. Déi zwee Museker Jean-François Zygel a Paul Lay sinn an zwou verschiddene Museksrichtunge verwuerzelt - Eemol an der Klassik, eemol am Jazz. Wat si verbënnt: D'Talent op der Bün ze improviséieren. Bei engem gemeinsame Concert dëse Sonndeg, den 02. Mäerz 2025 an der Philharmonie trieden si an engem Pianosduell géinteneen un.
Mee wéi geet Improvisatioun um Piano, an ass dës Iddi vum Pianosduell nei? Doriwwer schwätzt de Pianist Jean-François Zygel mam Marie Trussart aus der Opus-Ekipp.
3) Live-Concert mat der Vivi Vassileva an de Lëtzebuerger Philharmoniker
©Julia Wesely
Heartbeats
En neie Perkussiounsconcerto gouf fir déi éischte Kéier zu Lëtzebuerg opgefouert. D'Solistin Vivi Vassileva spillt mat de Lëtzebuerger Philharmoniker.
"Outside the box" - esou beschreift d'Philharmonie dëse Concert den Owend vum 27. Februar 2025. Am Mëttelpunkt stoung d'Vivi Vassileva. Déi bulgaresch-däitsch Perkussionistin trëtt weltwäit op an ass och ganz bekannt mat hire kreativen a positive Videoen op de soziale Medien.
An der Philharmonie huet si zesumme mat de Lëtzebuerger Philharmoniker gespillt. Am Fokus stoung en neit Wierk: "A Savage Beat"
Dëse Concert hu mir en Donneschdeg um opus 100,7 a radio 100,7 (Donneschdeg 27. Januar) aus der Philharmonie iwwerdroen. Et war eng gemeinsam Iwwerdroung mam SR Kultur, déi vum Christophe Mirkes a vum Maria Gutierrez moderéiert gouf.
D'Opnam vun dësem Concert kënnt Dir dann och nach eng Woch laang an eiser Mediathéik nolauschteren.
4) Por los Montes de Coñares - eise Klassik Album vun der Woch
Well Spuenien un der europäescher Peripherie läit, geréit et heiansdo aus dem Fokus vun der Museksgeschicht mat hire groussen Zentre Paräis, Wien a London.
Et gëtt alt emol iwwersinn, datt och Madrid eng Plaz ass, wou Museksgeschicht geschriwwe gouf, ënnert anerem an der Renaissance.
Net fir näischt gëtt dës Period och "Gëllen Zäit" genannt. Déi zwee Ensembelen Amystis a La Chimera Consort huelen eis op hirem aktuellen Album mat an dës Gëllen Zäit vu spuenescher Musek.
Iwwert dës Produktioun ënnerhält sech de Lex Kauffmann mam Guy Engels.