Bei där Visitt de Moien zu Kiew waren direkt awer och d‘Onrouen a Georgien een Theema. Den drëtten Owend hannertenee goufen et gëschter um Samschdegowend virulent Protester géint d‘Regierung, déi en Donneschdeg decidéiert hat, d‘Bäitrëttsverhandlunge mat der EU op Eis ze leeën.
Op en neits koum et bei dëse Protester zu Zesummestéiss mat der Police. D‘EU-Chefdiplomatin Kaja Kallas sot an der ukrainescher Haaptstad, datt d‘EU méiglecherweis Sanktioune géint Georgien decidéiert, wann de Regime weider fiert mat der Gewalt géint friddlech Demonstranten.