Wa bannent dräi Méint een Transfert d’Entreprise kéint gemaach ginn, da kéinten d’Aarbechtsverträg reaktivéiert ginn, huet de Minister preziséiert. De Georges Mischo hofft, datt d’Mataarbechter nach viru Chrëschtdag een Deel vun de Léin, déi si nach zu gutt hunn, kënnen ausbezuelt kréien.
Potentiell Repreneure vum Wierk vu Liberty Steel oder vun engem Deel dovu wieren a Kontakt mam Curateur vun der Faillite, esou haut um Donneschdeg de Wirtschaftsminister Lex Delles. Et wier wichteg, de Site zu Diddeleng rëm ze beliewen, a rëm nei Aarbechtsplazen do ze garantéieren.
Déi zoustänneg Chamberkommissioune goufen de Moien iwwert d’Faillite vu Liberty Steel an d’Konsequenzen dovun informéiert.
Op Nofro hin, hu mir vum Parquet confirméiert kritt, datt de Wirtschaftsministère d‘lescht Joer am November eng Denonciatioun gemeet hat. De Parquet hätt awer net genug Elementer fonnt, fir eng Enquête préliminaire wéinst enger Infractioun opzemaachen.