Wéi de Méla Guitar Quartet selwer schreift, ass hiren neien Album eng Entwécklung aus de leschte Joren.
An tatsächlech vermëttelt dës Release net nëmmen eng musikalesch Entwécklung, mee schaaft gläichzäiteg och en neit Versteesdemech fir d'Kläng vun der Gittar.
Bekannt, perkussiv, aktuell
Um Album fënnt ee vill bekannt Nimm erëm: Claude Debussy, Maurice Ravel, Camille Saint-Saëns, Rachmaninoff oder Holst. Gläichzäiteg ass et awer och d'Méiglechkeet nei Komponiste kennenzeléieren.
An och, wann een déi meescht Nimm a Wierker kennt, kléngen dës nei fir d'Ouer. Et sinn aussergewéinlech Arrangementer, déi gläichzäiteg immens perkussiv kléngen. An deem enge Wierk gëtt d'Gittar kuerzerhand als Tromm agesat andeems een um Holz spillt. An engem weidere Stéck erënnert de Klang un eng Harf.
Orientaleschen Touch a vill Ofwiesslung
Den Album iwwerzeegt besonnesch mat engem orientaleschen Touch an der Bacchanale vum Camille Saint-Saëns. Dëse kënnt op de Gittare besonnesch staark eraus a gëtt ganz rhythmesch accentuéiert.
"Overtures & Dances* kléngt am grousse Ganze ganz ofwiesslungsräich. Mol douce a gefillsvoll, schnell a virtuos oder och ee Mix aus bekannt an onbekannt. Zu dëser Ofwiesslung dréit och d'Spill vun de véier Musikerinnen a Museker Zahrah Hutton, Matthew Robinson, George Tarlton a Michael Button bäi. Si notze verschidde Spilltechniken op der Gittar a weisen: Egal ob fir groussen Orchester, Oper, Ensembel oder Solo-Instrument geschriwwen - d'Gittar kann all Stil kreativ ëmsetzen.
Villfälteg - an awer bësse lues
Um Release ginn et dann awer och vill lues Nummeren. "Au bois dormant", "lent" oder "très modéré" fënnt een als Bezeechnunge mir dann effektiv e bëssen ze oft erëm. Hei hätt een dann och een oder zwee méi wibbeleg Titelen um Album placéiere kënnen.
Déi perfekt Symbios aus Ënnerhalung a Berouegung
Alles an allem ass "Overtures & Dances" eng richteg gelonge Produktioun mat qualitativ héichwäertegem Mixage. Den Album ass déi perfekt Symbios aus Ënnerhalung a Berouegung, déi een no engem stressegen Dag siicht.