Fällt Iech einfach sou eng bekannte Melodie aus engem Harfeconcerto an? Den Album "Perspectives concertantes" vun der franséischer Harfenistin Anaëlle Tourret bitt direkt zwee Concertoen un: ee grousst Wierk aus dem Standardrepertoire (de Concerto vum Reinhold Glière) an eng Entdeckung (de Concertino vum Ernst von Dohnányi. Des Wierker si gekoppelt mat der Danse sacrée a profane vum Debussy.
Et ass den éischten Harfeconcerto, dee jemools an der ëmmer nach zimlech neier Elbphilharmonie zu Hamburg opgeholl gouf. Datt d'Opnam do gemaach gouf ass awer net verwonnerlech. D'Anaëlle Tourret ass selwer Deel vum NDR Elbphilharmonie Orchester, mat deem si de Concerto vum Glière opgeholl huet. Déi aner Stécker huet d'Franséisin mam Stuttgarter Kammerorchester opgeholl.
D'Konzeptioun vun dëser Produktioun ass gutt iwwerluecht, bis op eng Ausnahm:
De Glière, den Dohnányi an den Debussy hunn an der selwechter Zäit gelieft. Just den Debussy ass méi puer Jorzéngte méi fréi gestuerwe wéi déi aner zwee Komponisten. Et sinn dräi Museker mat ënnerschiddleche Klangsproochen an Idealer, déi sech awer an hirer Wierker mat Harf immens no kommen. Deementspriechend ass d'Programmatioun vum Repertoire passend. Déi eenzeg Fro, déi een sech kéint stellen ass, ob d'Opdeelung vun der Opnam vum Repertoire op zwee verschidden Orchesteren a Concertssäll, dëst Konzept wierklech ënnerstëtzt.
Déi héichwäerteg Produktioun weist duerch d'Iwwerschneidunge vun den dräi Komponisten, wat d'Harf technesch a klanglech ze bidden huet. Dës si vun der Solistin mat vill Prezisioun ausgefouert. Wat bei alle Wierker och zum Virschäi kënnt, ass der Harf hir natierlech Roll fir ze harmoniséieren oder ze begleeden. Dës Begleedunge sinn dacks séier a virtuos. Eng formidabel Léisung dofir war fir bei der Opnam d'Harf als solistescht Instrument net virum Orchester ze placéieren, mee an d'Mëtt vum Klangkierper. Doduerch gëtt de waarme Klang vun der Harf vum Orchester ëmginn an hir plazeweis spezifesch Roll als Accompagnatrice wierkt doduerch natierlech, ongezwongen.
Et ass insgesamt eng ofgeronnten Opnam, déi duerch spéitromantesch an impressionistesch Klangfaarwen en agreabele Moment garantéiert. Ofschléissend kann ee soen et wier eng amüsant a gemittlech Entdeckungsreess.