Wat ee virewech huele kann; Preludes and Dances from Brazil ass eng Produktioun déi sech perfekt dofir eegent, ze entspanen. Dat läit un de wierklech gefillvollen a berouegenden, akustesche Kläng vum Gittarist Ricardo Gallén.
Spuenesch-Brasilianeschen Temperament
Eise Klassik Album vun der Woch daucht an, an d'Kläng aus Latäinamerika. Zwee brasilianesch Komponiste stinn um Programm: de Sergio Assad an den Heitor Villa-Lobos.
De Komponist Sergio Assad, dee mat insgesamt 12 Preluden um Disk vertrueden ass, huet dës Musek dann och extra fir dës Produktioun geschriwwen. Hien hëlt mat senger Musek grousse Bezuch op d'Popmusek an et spigelt dat liewegt Musek-kulturellt Bild vu Brasilien erëm. Ze héieren ass dat ganz gutt un Aflëss aus diversen Traditiounen.
Dem Heitor Villa-Lobos seng Musek geet éischter an d' Folklor Richtung. D'Titele sinn dann och eng Grëtz méi dänzeresch gehalen an et fënnt ee Walzer oder Mazurken, also europäesch Danzformen erëm
Passioun fir d'akustesch Gittar
De spueneschen Interpret vum Album ass den 53 Joer ale Ricardo Gallén. Zanter 49 Joer ass de Museker dann och schonn der akustescher Gittar trei. Nodeems hie well mat 5 Joer éischt Concerte gëtt, entwéckelt hien sech immens schnell zu engem gefrote Solist a spillt bis haut an deene gréisste Concertshale mat renomméierten Orchesteren.
Fazit
Preludes and Dances from Brazil ass en Hommage un d'Gittare-Musek an déi brasilianesch Kultur. Et ass een Album deen eng immens Rou ausstraalt an dach ni langweileg oder monoton kléngt, och wa vereenzelt Titelen op déi éischt Ecoute ganz änlech kléngen.
Besonnesch stécht déi brillant Fangerfäertegkeet vum Ricardo Gallén ervir. Ma och deels ongewéinlech Harmonien, déi dës Produktioun zum Opus 100,7 Klassik Album vun der Woch maachen.