Eng Uergel an enger Schoul? - D'Uergelwei an der Privatschoul Sainte-Sophie um Kierchbierg
Zanter leschtem Mëttwoch huet Lëtzebuerg eng Uergel méi am Gebrauch. A Präsenz vum Kardinol an Äerzbëschof Jean-Claude Hollerich, gouf an der Ecole Sainte-Sophie an der Stad eng Uergel geweit.
Am Gespréich mam Lex Kauffmann erzielt den Zeremoniar Jean-Pierre Reiners wéi esou eng Uergelwei genee ofleeft.
Picture a day like this
Den Orchestre de Chambre du Luxembourg (OCL) steet den 28. Februar op der Bün vum Groussen Theater an der Stad fir eng zäitgenëssesch Oper opzeféieren. Et ass eng Koproduktioun tëscht verschiddenen Oper- an Theaterhaiser, ënnert anerem dem Groussen Theater an der Stad an dem Royal Opera House zu London.
De Lex Kauffmann huet sech mat der Dirigentin vum OCL Corinna Niemeyer, an der Co-Regisseurin Marie-Christine Soma, iwwert hir Kollaboratioun an déi zäitgenëssesch Oper "Picture a day like this" vum brittesche Komponist George Benjamin ënnerhalen.
Perkussiv, ënnerhalend a mat engem orientaleschem Touch
Eise Klassik Album vun der Woch ass eng Produktioun vum brittesche Méla Guitar Quartet: "Overtures and Dances". Ze héieren si Wierker vu bekannten a manner bekannte Komponiste mat virtuose Gittar-Arrangementer. Mat dobäi sinn de Claude Debussy, Maurice Ravel, Camille Saint-Saëns, Rachmaninoff oder Holst. Gläichzäiteg ass et awer och d'Méiglechkeet nei Komponiste kennenzeléieren - mee domat net genuch.
De Lex Kauffmann, dee sech den Album erausgesicht huet, fënnt et wier déi perfekt Symbiose aus Ënnerhalung a Berouegung, déi een no engem stressegen Dag siicht.