Méi wéi just déi véier Joreszäiten
Den neien Album vum Barockensembel Hexaton heescht "Vivaldi Incognito" – an de Numm ass Programm. De Vivaldi ass wuel virun allem fir seng véier Joreszäite bekannt, mee säi Repertoire geet wäit doriwwer eraus. De Barockensembel Hexaton, ënner der Leedung vum Guillaume Rebinguet Sudre, gräift fir dësen Album op Sonate fir Gei a Basso Continuo zeréck – Wierker, déi meeschtens am Schied vu senge méi populäre Concerte stinn.
E Bléck hannert d’Kuliss vum Virtuos
Vill vun de Wierker stamen aus dem sougenannte Manchester Manuskript - eng Sammlung, déi drop hiweist, datt dës Sonaten als Serie konzipéiert goufen. Dobäi erkennt een direkt dem Vivaldi seng musikalesch Sprooch an déi emotional Déift, déi och an dëse manner bekannte Stécker duerchbléckt. Eng flott Kombinatioun aus Vertrautem an Neiem.
Nei Stécker am ale Stil
Als Iwwerraschung fënnt een um Album och zwou Originalkompositioune vum Sudre, eng Toccata fir Cembalo an e Prelüd fir Theorbe. Déi orientéieren sech stilistesch un de 1720er Joren a fügen sech harmonesch an de Rescht vum Album an. Esou verbënnt "Vivaldi Incognito" d’Musek vun engem groussen italieneesche Meeschter mat enger frëscher, kreativer Handschrëft aus eiser Zäit.
