Panorama

D’Terror-Organisatioun “Islamesche Staat” kënnegt Frankräich weider Terror-Attacken un. Ob den IS-Message um Internet echt ass, konnt nach net onofhängeg iwwerpréift ginn. Bei den zäitgläichen Attacke vu gëschter sinn op d’mannst 127 Mënschen zu Paräis ëm d’Liewe komm. 250 weider Mënsche goufe blesséiert: verschiddener vun hinne schwéier.

D’Attacke gëschter Owend goufe vun op d’mannst 11 Täter gemaach. Si hu quasi gläichzäiteg op verschiddene Platzen zougeschlo. D’Täter hu mat Maschinnegewierer op Leit geschoss a si hu Bomme gezündt. 8 vun den Attentäter sinn dout. Net gewosst ass, ob weider Attentäter oder Komplizen op der Flucht sinn.

Déi franséisch Regierung huet den “Ausnamezoustand” deklaréiert. De franséische President François Hollande huet de Moien d’Terror-Miliz “Islamesche Staat” fir d’Attentat-Serie responsabel gemaach. De François Hollande huet vun engem “Krichs-Akt” geschwat. Wann d’Attentater zu Paräis wierklech op de Kont vum IS ginn, da wier et déi éischt coordinéiert Attack vun der Terror-Miliz an der westlecher Welt.

De syresche President huet de Weste fir den Terrorismus responsabel gemaach. D’Terror-Attacke vu gëschter zu Paräis an d’Expansioun vum Terrorismus wiere mat deem verbonnen, wat zënter fënnef Joer a Syrien geschitt, esou de Baschar Al-Assad haut bei enger Entrevue mat franséische Politiker zu Damaskus.

Zu Lëtzebuerg huet um 16 Auer een ausser-uerdentleche Regierungsrot u wéinst der Attentat-Serie vu Paräis. Fir duerno ass eng Declaratioun vum Regierungschef virgesinn. De Verdeedegungs-Minister a Minister fir Banne-Sécherheet Etienne Schneider, deen de Moment zu Washington ass, ass per Telefon am Regierungsrot bäi geschalt.

Episoden