Bei zäitgläichen Terror-Attacke si gëschter Owend zu Paräis (also) op d’mannst 128 Mënschen zu Paräis ëm d’Liewe komm. 300 weider Mënsche goufe blesséiert: 80 vun hinne ganz schwéier.

Hei am Land war de Mëtteg een ausser-uerdentleche Regierungsrot zesummen, wéinst der Attentat-Serie vu Paräis. D’Situatioun hei zu Lëtzebuerg huet sech net geännert, et gëtt keng konkret Menace hei am Land, esou de Premier Xavier Bettel am Briefing. D’Kontrollen op de Grenze solle verschäerft ginn, dozou gehéieren och d’Garen an de Fluchhafen. Dat op Demande vu Frankräich. D’Police an d’Douane solle méi Präsenz weisen.

D’Terror-Organisatioun “Islamesche Staat” kënnegt Frankräich iwwerdeems weider Terror-Attacken un. D’Attentats-Serie vu gëschter Owend an der franséischer Stad wier nëmmen eng éischt Warnung gewiescht, heescht et an engem IS-Message um Internet: engem Text op franséisch an op arabesch. Ob dëse Message authentesch ass, konnt nach net onofhängeg iwwerpréift ginn.

Vu Bréissel koum de Mëtteg d’Nouvelle, datt déi belsch Police am Quartier Molenbeek, Police-Operatiounen am gaange sinn, a Relatioun mat den Terror-Attacke vu Paräis. Rieds geet vu Perquisitiounen. Eng Persoun soll festgeholl gi sinn. Weider Detailer sinn nach net bekannt.

De franséische President François Hollande huet de Moien d’Terror-Miliz “Islamesche Staat” fir d’Attentats-Serie zu Paräis responsabel gemaach.

Och a Panorama: Korrespondenze vun eise Journalisten vu Paräis a vu Washington, an e Gespréich mam Lëtzebuerger Botschafter zu Paräis Paul Dühr.