Seng Wierker gi ronderëm déi ganz Welt opgefouert, ënner anerem zu St. Petersburg, London a Peking. Och hie selwer huet et fréi an d'Ausland gezunn. Firwat?
Dat erkläert de Komponist 1998 an engem radio 100,7-Interview esou: "Dat huet domat ze dinn, datt ech am Fong geholl jo ganz ganz fréi schonn am professionelle Liewe stoung. Ech hu mat 18 ugefaangen ze enseignéieren an ech si mat 21 hei scho Professer um Conservatoire ginn. A mat 26 hunn ech mech gefrot: Du kanns dat dach net bis 65 elo einfach esou weidermaachen. Do muss iergendeppes passéieren." Den Alexander Müllenbach hëlt d'Decisioun op Salzburg ze goen a baut sech do e Liewen als Enseignant, Komponist, Pianist an Dirigent op. Seng Verbindungen zu Lëtzebuerg gëtt hien awer ni op. Och fir säi 70. Gebuertsdag kënnt den Alexander Müllenbach nees op Lëtzebuerg, fir als Komponist vum Mount Januar mam Luc Boentges um radio 100,7 iwwer säi Liewen a Wierk ze schwätzen.