Am neie Sportzenter kann ee Medezinner:inne, Kinéen, Osteopathen an Osteopathinnen an Ernärungsberoder:inne consultéieren an op innovativ Apparater zeréckgräifen.
D’Iddi fir eng Sportsklinik wier virun e puer Joer opkomm, erkläert den Dr. Romain Schockmel, deen och President vun der Handball-Federatioun ass. 2,3 Joer hätt et gebraucht fir de Projet mat den Infrastrukturen op d’Been ze setzen.
E groussen Deel gëtt vun der CNS rembourséiert
8 Méint no der Ouverture, zitt de medezineschen Direkter vum CHEM ee positive Bilan. 1.700 Patientinnen a Patiente wieren an deem Zäitraum am neie Sportzenter zu Nidderkuer behandelt ginn. Ee groussen Deel vun de Prestatiounen, gëtt vun der Krankekeess rembourséiert, zum Beispill wann et em de Gesondheetszoustand vun enger Persoun geet.
Verschidde Prestatioune ginn allerdéngs net rembourséiert, zum Beispill Consultatiounen déi mat der sportlecher Performance ze dinn hunn oder bei engem Bilan iwwer d‘Ernierung. De Centre médical du Sport géing sech virun allem u jonk Sportler:innen adresséieren, déi wéilten eng Carrière entaméieren, präziséiert den Dr Romain Schockmel.