Souwuel de Franz Schubert wéi och de Franz Berwald ware Komponisten, deenen hiert Liewenswierk réischt laang no hirem Doud wierklech opgeschafft, gespillt a wäertgeschat gouf. Déi zwee verbënnt nieft hirem Numm a Schicksal awer och d'Verbonnenheet mat der romantescher Klangwelt. De Schubert huet sech laang Zäit éischter mat klenge Besetzunge wéi Pianosstécker oder Lieder beschäftegt an ass bis haut virrangeg fir dës bekannt. Seng Sinfonië sinn Zäit senges Liewens bal guer net ëffentlech opgefouert ginn, sou datt hien se zimmlech sécher ni selwer materlieft huet. Och dem Berwald seng Wierker goufen a Schwede laang net appreciéiert, sou gouf och seng "Sinfonie capricieuse" méi wéi 70 Joer no hirer Entsteeung uropgefouert.
Béid Sinfonien, dem Schubert seng "Kleng an Do Majeur" an dem Berwald seng "Sinfonie capricieuse" iwwerzeegen nieft hirem romantesche Gehalt duerch hir Sprëtzegkeet a fulminant-feierlech Passagen. Interpretéiert ginn dës zwee net sou dacks gespillte Wierker vum Swedish Radio Symphony Orchestra ënnert der Leedung vum Herbert Blomstedt. Dëse Live-Matschnëtt ass vu Sveriges Radio an der Berwaldhallen opgeholl ginn.
Lauschtere kënnt dir dëse Concert nach bis de 27. Abrëll 2025 an der Mediathéik vum opus 100,7.
Programm:
• Franz Schubert (1797-1828): Sinfonie Nr. 6 an Do Majeur, D. 589
• Franz Berwald (1796-1868): Sinfonie Nr. 2 a Ré Majeur ("Capricieuse")
Interpreten:
• Swedisch Radio Symphony Orchestra
• Herbert Blomstedt, Direktioun
