Parteien, déi behaapten et kéint een d’Klimakris just doduerch léisen, datt ee méi staatlech Subside verdeelt, géifen de Leit eppes virgaukelen, fënnt d’Blanche Weber.
"Mir hu verschiddener, déi mengen, d’Kris géif duerch Subside geléist ginn. Nom Motto: Et bléift beim Alen, a wa mer genuch Subside ginn, da kréie mer Solaranlagen an domat ass de Problem geléist."
Den Challenge vun der Politik wier fir d’Blanche Weber den, de Leit mat Begeeschterung ze vermëttelen, datt fundamental Changementer musse gemaach ginn, déi och mat Virdeeler verbonne wieren.
Keng Koherenz vun de Parteien
A Saache Klimaschutz-Politik wieren déi meescht Parteien net koherent, bedauert d’MouvEco Presidentin.
“Et kann een net soen, mir wëllen den ëffentlechen Transport ausbauen, a mir wëllen och weider Stroosse bauen. D’Buedemversigelung ass en anert Beispill: Mir mussen déi andämmen, schonn nëmmen aus Biodiversitéits-Siicht. An awer och fir d’Iwwerhëtzung vun eise Stied unzegoen.”
Verschidde Parteie géifen deem och zoustëmmen, wieren trotzdeem net dofir dat och ze reegelen, bedauert d'Blanche Weber.