De fréier President Donald Trump war virgëschter zeréck an der Stad Butler am Staat Pennsylvania, wou virun dräi Méint op hie geschoss gi war. Den Trump krut do weider Ënnerstëtzung vum Multimilliardär an Tesla-Grënner Elon Musk. Hien huet op der Bün d‘Leit opgeruff, de 5. November fir den Donald Trump ze wielen.
An de leschte Sondagen huet d‘Kamala Harris um nationale Plang e liichte Virsprong, mee an de sougenannte Swing-Staates, déi decisiv wäerte sinn, leien déi zwee praktesch ex-aequo. Manner wéi ee Mount virun de Wale soen déi meescht politesch Commentateuren an den USA, et géif en immenst knappt Resultat ginn, an et wier den Ament net virauszesoen, wie besser Chancen huet, d‘Wal ze gewannen.