De Wolfgang Amadeus Mozart huet seng Concertoen fir Sträicher alleguer an der Zäit tëschent 1773 a 1779 geschriwwen, ma keen dovunner weist e wierklech prezisen Datum op. Säi fënnefte Concerto fir Gei an Orchester gouf zwar wuel 1775 komponéiert, ma tëschenduerch ass den Datum um Manuskript schonn op 1780 a spéider nees zeréck op den éischten Datum geännert ginn. Dëse Concerto stécht awer virun allem duerch déi tierkesch Elementer aus dem drëtten a leschte Saz eraus, engem Rondo, dee mat Amenter och un de bekannte "Rondo alla Turca" aus senger 11. Pianosonat erënnert. Op der Gei ass et hei déi däitsch-japanesch Geiistin Arabella Steinbacher, déi dëse Solo-Part interpretéiert. Am zweeten Deel vum Concert hëlt de russesche Komponist Pjotr Iljitsch Tschaikowski eis da mat a seng romantesch-wëll Alpenromantik, déi en a senger programmatescher Manfred Sinfonie duerstellt. Baséierend op engem Text vum Lord Byron, ass hei rieds vum Manfred, deen déi inzestuéis Bezéiung mat senger Hallefschwester Astarte muss opginn an doropshin an d'Alpe flücht. Ma och hei fënnt hie kee Fridden a rengt mat sech a senge Gefiller. Doriwwer erzielt dem Tschaikowski seng Sinfonie a 4 ganz ënnerschiddleche Sätz. Opgeholl gouf dëse Concert am Auditorium Rainier III zu Monte-Carlo a Monaco an dir kënnt en nach fir ee Mount an der Mediathéik vum Opus nolauschteren. Programm: Wolfgang Amadeus Mozart (1756-1791): Geieconcerto Nr. 5 a La Majeur, K. 219 ("Tierkesch") Pjotr Iljitsch Tschaikowski (1840-1893): Manfred Sinfonie a Si Mineur, Op. 58 Interpreten: Arabella Steinbacher, Gei Orchestre Philharmonique de Monte-Carlo Andris Poga, Dirigent