Dem Sergueï Prokofiev säin 2. Pianosconcerto a Sol Mineur ass e Wierk, dat nawell seng Startschwieregkeeten hat: geschriwwen an de Joren 1912/1913, gouf et ufanks souwuel vum Public wéi och vun den deemolege Musekskritiker éischter negativ opgeholl. Nodeems d'Originalpartitur wärend dem 1. Weltkrich verluer gaangen ass, huet de Prokofiev 1923 eng nei Orchestréierung geschriwwen. Trotzdeem gouf d'Wierk, "Boosey & Hawkes" no, tëscht 1930 an 1949 keng eenzeg Kéier opgefouert. Dobäi ass d'Musek vun dësem 4-sätzege Wierk net oninteressant: typesch Elementer vum Expressionismus wéi staark dissonant Passage verschmëlzen hei mat spéitromantesche Kläng; do kann een dach awer vun engem ganz emotionale Wierk schwätzen. 
Als 2. Punkt um Programm steet dem Ludwig van Beethoven seng beléifte 6. Sinfonie, déi zäitgläich mat där bekannter 5. entstanen ass. Hire Bäinumm "Pastorale" kënnt hei net vun ongeféier: de Beethoven ass senger Zäit scho viraus a gräift dat typesch romantescht Leitmotiv vun der Natur op. An all Saz ginn Andréck aus der Natur an dem ländleche Liewen a senger Musek duergestallt. Hie selwer schwätzt vun der Perspektiv vum "Stadmënsch", deen d'Liewen um Land an d'Schéinheet vun der Natur fir sech nei entdeckt. 
Nieft de Lëtzebuerger Philharmoniker ënnert der Leedung vum Riccardo Minasi stécht bei dësem Concert virun allem de jonken hollännesche Pianist Nikola Meeuwsen eraus, deen 2025 de renomméierten "Concours Reine Élisabeth" gewonnen huet. 
Opgeholl gouf dëse Concert an der Philharmonie zu Lëtzebuerg an Dir kënnt en nach bis den 8. Abrëll 2026 an der Mediathéik vum Opus nolauschteren.

Programm:

Sergueï Prokofiev (1891-1953): Pianosconcerto Nr.2 a Sol Mineur, Op. 16

Ludwig van Beethoven (1770-1827): Sinfonie Nr.6 ("Pastorale")

Interpreten:

Nikola Meeuwsen, Piano

Lëtzebuerger Philharmoniker

Riccardo Minasi, Direktioun