Wat geschitt wann een deene Jonke jeeglech Barrièren ewech hëlt a sämtlech Grenze sprengt? Wat hu Villercher mat Musek ze dinn? Wéi komponéiert een iwwerhaapt? A wéi héiert sech e platoneschen ‘Coup de foudre’ un? Iwwert dat alles schwätze mir an de Resonanze vun haut.
Mir kucken zeréck op de Klassik Aktuell vum leschte Méinden, wou mir iwwert de Projet ‘Perspektives’ geschwat hunn. Dësen interdiszipilnäre Projet vum Stater Conservatoire bréngt Jonker aus de Beräicher Musek, Theater an Danz zesummen, a fuerdert se op jeeglech Barrièren ewech ze raumen a sämtlech Grenzen ze sprengen. An zesumme mat hiren Enseignantë kucken si wat dorauser entstoe kann.
Am Häerzstéck vun dëser Woch huet d’Marie Trussart sech dem Ottorino Respighi säi Wierk ‘Gli Ucceli’ méi genau ugekuckt. Fir dëst Wierk huet de Respighi seng Inspiratioun aus barocke Kompositioune gezunn, an d’Marie verréit eis och wéi eng Villercher een an dësem Wierk héiere kann.
Am Klassik Talk verréit eis de Lëtzebuerger Komponist Hy-Khang Dang wéi säi perséinleche Kompositiouns-Prozess ausgesäit, wat alles zu esou engem Kompositiounsprozess dozou gehéiert, a wéi hien am Alldag d’Inspiratioun fir seng Kompositioune fënnt.
An am Plackespiller vun dëser Woch huet d’Marie Trussart den néien Album ‘M’a dit Amour’ vun der franséischer Sopranistin Julie Roset an der amerikanescher Pianistin Susan Manoff virgestallt, deen eng eenzeg grouss Libeserklärung ass.
