D’Gewerkschaften haten an där Sitzung gefrot, ob de Minister géif garantéieren, datt d’Gewerkschaften an Zukunft och weider un de Verhandlunge vu Kollektivverträg bedeelegt bleiwen. Am CPTE wier awer keng Äntwert vum Minister komm, notéiert den LSAP-Deputéierte Georges Engel, dee Versteesdemech fir d’Gewerkschaften huet.
"De Minister huet e Plan d'action presentéiert, wou hie wëll d'Pisten opmaachen an do hunn d'Gewerkschafte gefrot: 'Ginn d'Kollektivvertrag-Diskussioune weider mat de Gewerkschaften, kënnen déi weider mat Gewerkschafte gefouert ginn? Oder gëtt do eng Dier opgemaach, dass do anerer Independante kënnen déi Kollektivvertrag-Diskussioune féieren? An de Minister huet dorobber keng Äntwert ginn."
Elo géif de Georges Mischo soen, hien hätt de Gewerkschaften näischt ewechgeholl, esou de Georges Engel. Mee:
"Wann hien de Gewerkschaften näischt hätt wëllen ewechhuelen, dann hätt ee kéinte ganz kloer soen: 'Fir mech ass et kloer, Kollektivvertrag, déi gi mat de Gewerkschaften diskutéiert a mat kengem aneren.' Dat huet hien net gemaach."