D'Resultater goufe bis ewell nach net offiziell vum zoustännege Ministère matgedeelt.
Et wier ee ganz zefridde mam Resultat an der Participatioun vun dësem Joer, esou de President vun der FGFC Claude Reuter. Virun allem mat Bléck op d’Sozialwalen am private Secteur zejoert. Bei deene Wale loung de Participatiounstaux bei 34,4 Prozent.
“Ech mengen de leschte Sëtz ze kréien ass eng arithmeetesch quasi Onméiglechkeet. Et hu méi Leit matgemaach. Et waren natierlech och méi Leit eligibel fir ze wielen. Ech mengen 62 Prozent sinn net d'Welt. Awer et ass emol besser wéi an ale Sozialwalen.”
Dee leschte Sëtz kritt den OGBL
E konstant Resultat fir den OGBL par rapport zu de leschte Walen am Joer 2020.
Den SEW, also de Syndikat fir Erzéiung a Wëssenschaft vum OGBL, bleift och bei engem Mandat. D'’Presidentin Joëlle Damé weist sech zefridden, datt ee konstant bliwwe wier. Och wann et dës Kéier net beim Fondamental wier. D'Andeelung vun de Gruppe war nämlech an Tëschenzäit geännert ginn.
“Doduerch datt d'Chargé-de-coursen elo eleng waren, krute mir dann do bei de Chargé-de-coursen dee Sëtz bäi. Dat heescht, den SEW ass ëmmer bei engem Sëtz, awer eeben an engem anere Grupp.”
Beim Fondamental krut d'GFP nach ee Sëtz bäi zënter de leschte Walen.
