Max Tholl (Paräis)
Am olympesche Geescht bleiwen: Dat war de Message vum franséische Premier Michel Barnier no de Feierlechkeete fir déi franséisch Olympia-Athleeten an Athleetinnen um Samschdegowend.
Regierung soll breet opgestallt ginn
Et misst een elo zesummeschaffen, fir déi politesch Divisioun ze iwwerwannen. Mat Spannung gëtt elo erwaart, mat wéi enger Regierungsekipp de Barnier dat packe wëllt. De Premier hat am Virfeld schonn uklénge gelooss, datt hien eng Regierung wëllt, déi breet opgestallt ass.
Fir de fréiere President François Hollande kéint dat awer schwéier ginn. Well de Barnier Member vun enger Partei ass, déi knapp 8 Prozent bei der Wal erreecht huet, a well hien d’Zoustëmmung vum rietsextreemen RN huet, ass eng Regierungsparticipatioun vun der Gauche onméiglech, esou den Hollande gëschter um franséischen RTL.
Les Républicains wäerten d'Regierung wuel net dominéieren
Fir de François Bayrou, Chef vum Modem, ass et awer dréngend néideg och lénk Persounen an der Regierung ze hunn, wéi hie gëschter Owend op BFMTV erkläert huet. D'Rumeur, datt de Barnier eng Regierung kéint opstellen, an där seng Partei Les Républicains dominéiert, hält de Bayrou fir wéineg warscheinlech. Esou eng Regierung hätt keng Chance a seng Partei géing sech och net un esou enger bedeelegen.
Eng minoritär Partei kéint dem Land net seng Politik opzwéngen, esou de François Bayrou, dee sech och dofir ausgeschwat huet, bei der neier Regierung keng oder bal keng Persounen aus der leschter ze iwwerhuelen.