Just e puer Leit hätte fir den Zodi am Mamer Lycée gesuergt a Stëmmung géint d’Direktioun gemaach. Et war jo Rieds gaange vun engem schlechtem Aarbechtsklima a Kommunikatiounsproblemer. De Claude Christnach huet confirméiert, datt d‘Stëmmung am Lycée schlecht gewiescht wier, mee huet och argumentéiert, datt vill Drock ënnert den Aarbechtskolleegen- a Kolleeginne gemaach gouf.
"Well am Juli hunn déi Leit mat hiren Aktioune jo fäerdeg bruecht, datt 1.300 Schüler an 200 Enseignanten sech d‘Fro gestallt hunn: wat ass da bei iech lass? Dat huet eis getraff, och mech perséinlech bis an d‘Privatsphär eran."
Zu enger Mediatioun ass et ni komm
Vu Säite vun der Direktioun wier awer och nach Sputt no uewe gewiescht, gëtt de Claude Christnach zou. Trotz alle Beméiunge, konnt d'Ambiance an der Schoul net verbessert ginn. Sou hat de Ministère eng Mediatioun proposéiert. Zu där ass et ni komm, well déi "vun där anerer Säit da rëm platze gelooss ginn ass."
Nodeems no der Rentrée dës Leit suguer probéiert hätten, fir Schüler mat an d’Diskussioun eran ze zéien, hätt hie fir sech selwer décidéiert, e Schlussstréch ënnert seng Karriär am Mamer Lycée ze zéihen, esou nach de Claude Christnach.