Wat ass eigentlech e Pianostrio? Sécherlech kee Stéck fir dräi Pianoen. Vill méi dréit et sech heibäi ëm Wierker, déi fir gewéinlech fir en Trio vun enger Gei, engem Cello an engem Piano geschriwwe goufen.
Datt dës Gattung sech grad esou wéi anerer och am Laf vun der Geschicht verännert huet an all Komponist dorausser seng eegen Interpretatioun gemaach huet, versteet sech vum selwen. Ëmsou méi interessant fir hei zwee stilistesch ënnerschiddlech Komponisten openeen treffen ze loossen. De Joseph Haydn, ee vun den Haaptkomponisten aus der Wiener Klassik, huet vill ënnerschiddlech Gattunge geschriwwen an där och net ze mann: ganzer 107 Sinfonien huet hien zu Liefzäite komponéiert.
Mee och bei de Pianostrioe war hie ganz produktiv. Esou ass et hei säin 39. Pianostrio a Sol Majeur, dee sech aus 3 Sätz zesummebaut an och nach de Bäinumm "Zigeinertrio" dréit. Dëst erkläert sech virun allem duerch de Rondo am leschte Saz. Deen huet eng Rei Motiver wéi de "Verbunkos", en typeschen Danz aus Ungarn vum 18. Joerhonnert, déi de Saz fir déi deemoleg Zäit zimmlech onkonventionell klenge loossen.
Do hannendrunner kënnt dann dat zweet Stéck vum Programm: dem Pjotr Iljitsch Tschaikowski säi Pianostrio a La mineur, säin éischten an och eenzegen. Dofir packt dësen et awer op eng Gesamtlängt vu bal 45 Minutten. Dëse Concerto, deen dem grousse Pianosvirtuos Nikolai Rubinstein dediéiert ass, setzt sech awer aus nëmmen zwee Sätz zesummen, déi allen zwee en Trauermarsch zum Schluss enthalen. Geschriwwen um Joreswiessel tëschent 1881 an 82, bestécht dëse Concerto och duerch seng Kontraster a virun allem déi vill Variatiounen am zweete Saz, déi d'Musek eropschaukelen bis zu enger ongebremster Ekstase. Dee Moment wou dës ofbrécht fält d'Musek zeréck an d'Theema aus dem éischte Saz a schléisst da mat engem Trauermarsch of.
Opgeholl gouf dëse Concert am Royal Concertgebouw zu Amsterdam.
Programm:
Joseph Haydn (1732-1809):
• Pianostrio Nr. 39 a Sol Majeur, Hob. XV:25 ("Zigeinertrio")
Pjotr Iljitsch Tschaikowski (1840-1893):
• Pianostrio a La mineur, op.50
Interpreten:
• Noa Wildschut, Gei
• Benjamin Kruithof, Cello
• Nikola Meeuwsen, Piano
