1) Benjamin Schäfer an den Orchestre Place de l'Europe
De Museker an Dirigent Benjamin Schäfer leet mat Begeeschterung den Orchestre Place de l'Europe. Eng Formatioun aus 110 Amateurmusiker:innen. Et ass eng Tâche, déi dem Profimuseker aus de Reie vun de Lëtzebuerger Philharmoniker vill Freed mécht. Bei där hie vun de Museker:innen awer och d'selwecht vill verlaangt wéi am Profiorchester. Elo steet dann e weidere Concert um Programm, bei deem den Orchester vum Klarinettist Arthur Stockel, och Member bei de Lëtzebuerger Philharmoniker, solistesch begleet gëtt. Am Gespréich mam Marie Trussart hëlt de Benjamin Schäfer eis mat a seng Iwwerleeungen, wéi eng Faktoren ee gudde Concert ausmaachen. Hei verréit de Museker och, wéi hie selwer mat Nervositéit ëmgeet.
2) Midwinter Melodies mam Chouer vun der Uni.lu
De Chouer vun der Uni.lu trëtt haut (8.12.) um 5 nach eng leschte Kéier zu Bartreng an der Kierch Saints Pierre et Paul op. Gesonge gëtt en internationale Programm an de meescht geschwate Sproochen hei am Land. De Motto vun de Concerten ass Midwinter Melodies. De Christophe Mirkes huet sech mam Dirigent Thomas Gareau, deen de Chouer zanter 2021 leet, ënnerhalen a gefrot, firwat den Titel Wantermelodien ass an net Chrëschtmelodien.
3) Christmas Carols mat den Amis du Chant Luxembourg
Christmas Carols ass e Concert deen d’Amis du Chant Luxembourg schonn zanter 1992 organiséieren. Um Programm steet englesch Chrëschtmusek an englescher Sprooch. Dëst Joer séngt de Chouer dee Concert direkt zweemol - eemol wéi gewinnt am Stater Conservatoire an eemol an der Porkierch zu Mäerzeg. Op der Affiche steet dëst Joer awer och e weidere Chrëschtconcert um Belval am Kader vum Evenement Blast into Christmas, mat feierleche Lidder op Lëtzebuergesch, Däitsch, Franséisch an Englesch. Den Dirigent Fränz Theis huet dem Marie Schockmel méi verroden.
4) Klassik-Album vun der Woch: Polnesch Romantik mam Meccore String Quartet
De Meccore String Quartet, deen 2007 vun deemolege Studente gegrënnt gouf, huet en neien Disk erausbruecht. Drop ze héieren ass polnesch Romantik vu Wieniawski a Paderewski. Zwee Komponisten, déi an den haitege Kammermuseksprogrammer net verwuerzelt sinn, awer zu onrecht negligéiert goufen.
