Ënnert dem Titel “Romantique avant 1850” steet dëse Concert an der Philharmonie, bei deem den Arthur Stockel, Soloklarinettist bei de Lëtzebuerger Philharmoniker, zesumme mam Sträichquartett “Quatuor Hanson” ze héieren ass. Den Ensembel presentéiert ënner anerem e Wierk wat och um jonke Klarinettist sengem éischten Album “Weber” ze fannen ass, deen am Januar erauskoum.
Mat um Programm ass de Klarinettequintett vum Mozart aus dem Joer 1789, dat wuel bekanntste Wierk fir dës Formatioun. De Carl Maria von Weber huet säi Klarinettequintett ronn 25 Joer méi spéit geschriwwen, an hat domat och de Virdeel, datt hien op dësem grousse Virbild vun der Kammermusiksgattung opbaue konnt. Doriwwer eraus hat d’Klarinett an deene Joren nach eemol e Sprong an der technescher Entwécklung gemaach, déi de Weber voll ausgenotzt huet, an déi déi eng oder aner weider Erausfuerderung fir d’Solo-Klarinett mat sech bréngt.
Dir kënnt dëse Concert, presentéiert vum Tanja Duprez, nach bis den 20.04.2025 hei an der Mediathéik nolauschteren.
Programm:
Robert Schumann: Fantasiestücke op.73 (arr. Jonathan Keren)
Wolfgang A. Mozart: Klarinettenquintett KV 581
Carl Maria von Weber: Klarinettenquintett op.34
Interpreten:
- Arthur Stockel, Klarinett
Quatuor Hanson
- Anton Hanson, Gei
- Jules Dessap, Gei
- Gabrielle Lafait, Braatsch
- Simon Dechambre, Cello
