Haut, de 5. Juni ass den internationalen Ëmweltdag vun de Vereenegten Natiounen. De Weltëmweltdag gouf am Joer 1972 gegrënnt, am Kader vum Weltëmweltgipfel vun der UNO, der Stockholmer Konferenz fir de Schutz vun der Ëmwelt, bei där eng Rei Ëmweltschutzprogrammer entstane sinn. Mëttlerweil gëtt en an iwwer 150 Länner gefeiert. D’Land an deem e stattfënnt wiesselt all Joer, dëst Joer ass et Aserbaidjan.
All Joer gëtt et och e spezifesche Motto, dëst Joer ass et “NowForClimate” also “Elo fir d’Klima”. Well d’Léisunge fir d’Klimakris si jo scho längst bekannt, elo ass et also endlech un der Zäit eppes ze maachen. An och zu Lëtzebuerg spiert ee schonn d'Follge vum Klimawandel: et gëtt ëmmer méi laang dréchen, et ginn ëmmer méi Iwwerschwemmungen an eis Wantere ginn ëmmer méi waarm.
De Weltëmweltdag setzt säi Fokus op de Klimawandel, mee deen Dag soll awer och do sinn, fir de Leit de Courage ze ginn. Well jiddweree kann eppes fir eise Planéit maachen. Trotz deene schlechten Noriichten, déi een ëmmer nees matkritt, wëllt d'UNO engem Hoffnung ginn: et gëtt ëmmer méi an nohalteg Energie investéiert, Stied ginn nei entworf, fir méi agreabel fir d'Awunner:innen ze ginn an et ginn ëmmer méi Beem geplanzt. D'UNO wëllt optimistesch sinn a visibel maachen, datt d'Léisunge fir d'Klimakris lues, awer sécher op der ganzer Welt applizéiert ginn.
